બેંગલુરુ | ૯ ઓક્ટોબર ૨૦૨૬ | દેશભરના યુવા સંગીતકારોને પોતાની કલા રજૂ કરવાની તક આપતી ‘યામાહા ટીન્સ રોક 2026 – ધ બેટલ ઓફ બેન્ડ્સ’ સ્પર્ધાની ગ્રાન્ડ ફિનાલે બેંગલુરુના પ્રેસ્ટિજ સેન્ટર ફોર પરફોર્મિંગ આર્ટ્સ ખાતે યોજાઈ હતી. યામાહા મ્યુઝિક ઇન્ડિયા દ્વારા ટ્રિનિટી કોલેજ લંડનના સહયોગથી આયોજિત આ સ્પર્ધામાં યુવા કલાકારોએ સંગીત પ્રત્યેનો ઉત્સાહ, સર્જનાત્મકતા અને ટીમવર્કનું સુંદર પ્રદર્શન કર્યું હતું.
આ રાષ્ટ્રીય સ્પર્ધામાં મિઝોરમની ન્યૂહોફ ઇંગ્લિશ મીડિયમ સ્કૂલના ન્યૂહોફ સ્કૂલ બેન્ડે વિજેતાનો ખિતાબ મેળવ્યો હતો. તમિલનાડુની સીએસ એકેડમીનું સીએસ હાઉલર્સ બેન્ડ પ્રથમ રનર-અપ રહ્યું હતું, જ્યારે પશ્ચિમ બંગાળની શ્રી હનુમાન મંદિર ધર્મશાળા સ્કૂલના ધ એપ્રિસિટી બેન્ડે બીજા રનર-અપ તરીકે સ્થાન મેળવ્યું હતું.
ગ્રાન્ડ ફિનાલેમાં ફાઇનલ સુધી પહોંચેલા બેન્ડ્સે પોતાના સંગીતથી શ્રોતાઓને મંત્રમુગ્ધ કર્યા હતા. આ ઉપરાંત કેએમ મ્યુઝિક કન્ઝર્વેટરી, ધ સનશાઇન ઓર્કેસ્ટ્રા અને યામાહાના કલાકારો દ્વારા પણ વિશેષ પ્રસ્તુતિઓ આપવામાં આવી હતી. કાર્યક્રમનું મુખ્ય આકર્ષણ યામાહા મ્યુઝિક ઇન્ડિયાના બ્રાન્ડ એમ્બેસેડર અને જાણીતા સંગીતકાર એ.આર. રહેમાનની ઉપસ્થિતિ રહી હતી. તેમની હાજરીમાં પોતાની કલા રજૂ કરવાની તક મળવી એ યુવા કલાકારો માટે યાદગાર અનુભવ બની રહ્યો હતો.
આ પ્રસંગે એ.આર. રહેમાને જણાવ્યું હતું કે, “સંગીત યુવાનોને પોતાની લાગણીઓ અને વિચારો વ્યક્ત કરવાની એક અનોખી તક આપે છે. ટીન્સ રોક જેવા મંચ તેમની પ્રતિભાને લોકો સુધી પહોંચાડવામાં મહત્વની ભૂમિકા ભજવે છે. અલગ-અલગ પ્રદેશોમાંથી આવેલા યુવા કલાકારોને આટલા ઉત્સાહ અને આત્મવિશ્વાસ સાથે રજૂઆત કરતા જોવાનો અનુભવ ખૂબ આનંદદાયક રહ્યો. હું તમામ ફાઇનલિસ્ટને અભિનંદન પાઠવું છું અને આશા રાખું છું કે આ અનુભવ તેમને સંગીતમાં સતત શીખવા, નવી રચનાઓ કરવા અને પોતાની આગવી ઓળખ ઊભી કરવા પ્રેરિત કરશે.”
યામાહા ટીન્સ રોક 2026ને દેશભરમાંથી નોંધપાત્ર પ્રતિસાદ મળ્યો હતો. સ્પર્ધા માટે 680થી વધુ નોંધણીઓ અને 270થી વધુ વિડિયો એન્ટ્રીઓ પ્રાપ્ત થઈ હતી. ઓનલાઇન અને ઓફલાઇન ઓડિશનના વિવિધ તબક્કાઓ બાદ દેશભરના 13 યામાહા મ્યુઝિક સ્ક્વેર ખાતે સેમિફાઇનલ યોજાઈ હતી. અંતે પાંચ ઝોનલ વિજેતાઓ અને જાહેર મતદાન દ્વારા પસંદ થયેલા એક બેન્ડ સહિત કુલ છ બેન્ડ્સે ગ્રાન્ડ ફિનાલેમાં સ્થાન મેળવ્યું હતું.
સ્પર્ધાના નિર્ણાયક મંડળમાં જાણીતા કલાકારો રણજિત બારોટ, ગુલરાજ સિંહ અને રિધમ શૉ ઉપરાંત ટ્રિનિટી કોલેજ લંડનના મ્યુઝિક એન્ડ પરફોર્મિંગ આર્ટ્સ વિભાગના ડિરેક્ટર સ્ટુઅર્ટ બ્રાઇનરનો સમાવેશ થતો હતો. સ્પર્ધકોનું મૂલ્યાંકન તેમની સંગીતની સમજ, સર્જનાત્મકતા, સ્ટેજ પરની રજૂઆત અને એકંદર પ્રદર્શનના આધારે કરવામાં આવ્યું હતું.
યામાહા મ્યુઝિક ઇન્ડિયાના મેનેજિંગ ડિરેક્ટર કેન્નેઈ સાકાઈએ જણાવ્યું હતું કે, “અમારું માનવું છે કે સંગીત લોકોને એકબીજા સાથે જોડે છે, આત્મવિશ્વાસ વધારે છે અને સર્જનાત્મક વિચારસરણીને પ્રોત્સાહન આપે છે. ટીન્સ રોકની શરૂઆત માત્ર એક સ્પર્ધા તરીકે કરવામાં આવી નથી. આ એક એવો મંચ છે, જ્યાં દેશભરના યુવાનો સાથે મળીને સંગીત શીખી શકે, પોતાની લાગણીઓ વ્યક્ત કરી શકે અને આત્મવિશ્વાસપૂર્વક પોતાની કલા રજૂ કરી શકે.”
તેમણે વધુમાં જણાવ્યું હતું કે ટ્રિનિટી કોલેજ લંડન સહિતના સહયોગીઓ સાથે મળીને યામાહા સંગીત શિક્ષણ અને લાઇવ પરફોર્મન્સની તકો વધુ યુવાનો સુધી પહોંચાડવા માટે પ્રતિબદ્ધ છે. ટીન્સ રોકને ભારતની અગ્રણી યુવા બેન્ડ સ્પર્ધાઓમાં સ્થાન અપાવવાનું કંપનીનું લાંબા ગાળાનું લક્ષ્ય છે.
ટ્રિનિટી કોલેજ લંડનના ઇન્ડિયા હેડ સચિન દાસે જણાવ્યું હતું કે, “ટીન્સ રોક સંગીતના શિક્ષણ અને સ્ટેજ પરના વાસ્તવિક અનુભવ વચ્ચે મહત્વપૂર્ણ કડીનું કામ કરે છે. આ મંચ યુવા સંગીતકારોને અન્ય કલાકારો સાથે કામ કરવાની, આત્મવિશ્વાસ કેળવવાની અને પ્રેક્ષકો સામે પોતાની કલા રજૂ કરવાની તક આપે છે. સંગીતની આવડતની સાથે સર્જનાત્મકતા, ટીમવર્ક અને પોતાની આગવી અભિવ્યક્તિને પ્રોત્સાહન આપતી આ પહેલમાં યામાહા મ્યુઝિક ઇન્ડિયા સાથે જોડાવાનો અમને આનંદ છે.”
યામાહા મ્યુઝિક ઇન્ડિયા અને ટ્રિનિટી કોલેજ લંડન આ ભાગીદારી દ્વારા સંગીતના શિક્ષણને પ્રત્યક્ષ પ્રદર્શનની તકો સાથે જોડવાનો પ્રયાસ કરી રહ્યાં છે. આ પહેલથી યુવા કલાકારોને પોતાની આવડત વિકસાવવા માટે યોગ્ય મંચ મળશે અને ભારતમાં બેન્ડ સંગીતની સંસ્કૃતિને વધુ પ્રોત્સાહન મળશે.
== સમાપ્ત ==